इलाम, १९ फागुन । उपप्रधानमन्त्री तथा स्थानीय विकास मन्त्री प्रकाशमान सिंहले एनेकपा ९माओवादी० र मधेसवादी दलका कारण स्थानीय निकायको निर्वाचन गर्न नसकिएको बताउनुभएको छ । 

 

स्थानीय निकाय जनप्रतिनिधिविहीन हुँदा स्थानीय निकायमा भ्रष्टाचार बढेको जनगुनासो आए पनि त्यसलाई सम्बोधन गर्न नसकिएको मन्त्री सिंहले बताउनुभयो । 

 

इलाम जिल्लाको २१औँ जिल्ला परिषद्को आज उद्घाटन गर्नुहुँदै मन्त्री सिंहले दोस्रो संविधानसभाको निर्वाचन सम्पन्न भएको छ महिनाभित्र स्थानीय निकायको निर्वाचन गर्ने भनेर जनतालाई भनिए पनि त्यो विभिन्न राजनीतिक दलका कारण हुन नसकेको बताउनुभयो । 

 

“संविधान जारी गर्न प्रक्रिया अघि बढाउँदा एमाओवादीलगायतका ३० दलीय मोर्चा सडक सङ्घर्षमा गएको बताउँदै सडक सङ्घर्षबाट कुनै निकास निस्कँदैन, वार्ता र सहमतिमा आउनुस्”, भन्नुभयो । अहिलेका जनता आन्दोलन गर्दागर्दा वाक्क भएका छन्, आन्दोलन होइन सहमति र सहकार्यमा अघि बढ्न उहाँले ३० दलीय मोर्चालाई सुझाव दिनुभयो । सङ्घीय गणतन्त्र, लोकतन्त्रलाई संस्थागत गर्न संविधान जारी हुनु आवश्यक रहेको उहाँको भनाइ थियो । 

 

शासकीय स्वरुप, राज्य पुनःसंरचना, निर्वाचन प्रणाली आदि विषयमा सबै दल सहमति नजिक पुगेकाले संविधान जारी गरेरै छाड्ने उपप्रधानमन्त्री सिंहले बताउनुभयो । 

 

जिल्ला विकास समिति इलामले आगामी आर्थिक वर्ष २०७२÷७३ का लागि रु तीन अर्ब १३ करोड २० लाख ७३ हजारको बजेट सार्वजनिक गरेको छ ।

 

स्थानीय विकास अधिकारी मदन कोइरालाले कार्यक्रम खर्चतर्फ रु दुई अर्ब १४ करोड २३ लाख ८५ हजार र प्रशासनिक खर्चतर्फ ९८ करोड ९६ लाख ८८ हजारको बजेट प्रस्तुत गर्नुभयो । 

 

बजेट सार्वजनिक कार्यक्रममा सभासद् केशव थापा, सुजाता परियार, केशवकुमार बुढाथोकी तथा स्थानीय राजनीतिक दलका प्रतिनिधिहरुले बजेट कार्यन्वयनमा जोड दिनुभयो । सो अवसरमा जिल्लामा विभिन्न क्षेत्रमा योगदान पु¥याउने कृषक, सञ्चारकर्मी, गैससकर्मी, कर्मचारीलगायतलाई पुरस्कृत गरिएको थियो । रासस