इटहरी, १८ फागुन । 

राष्ट्रिय प्रजातन्त्र पार्टी नेपालका अध्यक्ष कमल थापाले संविधान निर्माण कार्य जहाँ पुगेको छ त्यहीँ थाती राखेर संविधानसभामा भएका ३१ दल बसेर संविधान बनाउने छुट्टै कार्यतालिका बनाउँदै जान सकेमामात्र आगामी जेठसम्ममा संविधान बन्न सक्ने स्थिति रहेको बताउनुभएको छ । 

 

आज यहाँ आयोजित पार्टीको पूर्वाञ्चल क्षेत्रीय समीक्षा कार्यक्रममा सहभागी हुन यहाँ आइपुग्नु भएको उहाँले सञ्चारकर्मीसँगको कुराकानीमा नेपाली काँग्रेस, नेकपा (एमाले) र एनेकपा (माओवादी)सहित मधेसवादी मोर्चाबीच संविधान बनाउने विषयमा कुनै तात्विक फरक नरहेको जिकिर गर्नुभयो । 

 

सम्पूर्ण राजनीतिक दलहरूले स्पष्टसँग हामी नेपालीहरूको दस्तावेज हो भन्ने भावनासहितको अपनत्व ग्रहण गर्न नसक्ने संविधान आम नेपालीको संविधान बन्न नसक्ने ठोकुवा गर्दै अध्यक्ष थापाले त्यसका लागि नीतिगत प्रक्रियासँगै ३१ दलीय सहमति आवश्यक पर्ने पनि स्पष्ट पार्नुभयो । रासस