पवन पौडेल

तनहुँ, फागुन १८ ।

नेपाली कांग्रेसका उपसभापति रामचन्द्र पौडेलले एमाओवादी अध्यक्ष पुष्पकमल दाहालले बोली फेरेकाले देशले संविधान नपाएको दाबी गरेका छन् । 

 

गणेशमान बलिदानी अभियान अन्र्तगत तनहुँ दुलेगौंडामा भएको सभालाई सम्बोधन गर्दै उनले ठाउँपिच्छे बोली फेरिदिनाले दाहालको बोलीको भर पर्न नसकेको बताए । भावी संविधानका सासकिय स्वरुप र न्याय प्रणाली लगायतका विषयमा पहिले सहमति गर्न तयार छौं भने पनि पछि बोली फेरेकाले संविधान निर्माण नै प्रभावित भएको उनले बताए ।

 

पौडेलले गणेशमान सिंहजस्तो बोली नफेर्ने र अडान लिने व्यक्तिको नेपाली राजनीतिमा खाँचो औंल्याए । देशमा कुशल राजनीतिक नेतृत्व दिएर संविधान बनाउनका लागि गणेशमान सिंह जस्तै व्यक्तित्व आवश्यक रहेको बताए ।

 

नेपाली काग्रेसका क्षेत्रीय सभापती महेश्वर भट्राईको सभापतित्वमा सम्पन्न सभामा नेपाली कांग्रेसका नेता एव्म केन्द्रीय नीति तथा प्रशिक्षण प्रतिष्ठानका सदस्य जीतप्रकाश आले, केन्द्रीय सदस्य जीवन परियार, पूर्व केन्द्रीय सदस्य अमरराज कैनी,  केन्द्रीय नीति तथा प्रशिक्षण प्रतिष्ठानका सदस्य जगदिशचन्द्र पोखरेल, नारायणदत्त मिश्र, पार्टी जिल्ला उपसभापति ताराराज राना, महासमिति सदस्य मीरा जोशी लगायतले बोलेका थिए ।