काठमाडौँ,फागुन ११

एकीकृत नेकपा माओवादीका अध्यक्ष पुष्पकमल दाहालले ३० दलले अहिले गरिरहेको आन्दोलनलाई राष्ट्रपतिको पद पाउन गरेको वार्गेनिङका रुपमा नबुझ्न कार्यकर्ताहरुलाई आग्रह गर्नुभएको छ । 

 

अखिल नेपाल ट्रेड युनियन महासंघले सोमबार ललितपुरको खन्ना गार्मेण्टमा गरेको प्रशिक्षण कार्यक्रममा एमाओवादी अध्यक्ष दाहालले सेरेमोनियल राष्ट्रपति बन्ने आफ्नो कुनै इच्छा नभएको बताउनुभयो । उहाँले सेरेमोनियल राष्ट्रपतिलाई खोपीको देवता भन्दै आफ्ना लागि खोपीको देवताभन्दा  आन्दोलन नै बढी प्यारो भएको बताउनुभयो । उहाँले कार्यकारी राष्ट्रपति बन्न भने आफू इच्छुक रहेको तर अहिले त्यस्तो शासकीय व्यवस्था सम्भव नै नरहेको बताउनुभयो ।

 

निकै ठट्यौली मुद्रामा प्रस्तुत भएका एमाओवादी अध्यक्ष दाहालले ३० दलीय मोर्चाले अहिले गरिरहेको आन्दोलनलाई रक्तपातविहिन युद्ध भन्दै युद्धमा सेनाको भूमिकामा प्रस्तुत हुन कार्यकर्ताहरुलाई निर्देशन दिनुभयो । उहाँले जनयुद्धबाट प्राप्त उपलब्धिको रक्षाका लागि फेरि एक पटक आन्दोलन गर्नुपर्ने अवस्था आएको भन्दै कार्यकर्ताहरुले आफूलाई सेनाको भूमिकामा खरो उतारे नेपाली काँग्रेस र नेकपा एमाले दुई तिहाइ वहुमतको प्रक्रिया रोक्न वाध्य हुने बताउनुभयो । उहाँले फागुन १६ गतेको जुलुस र सभामा सरकारले प्रहरीमार्फत लाठी प्रहार गरे लाठीबाटै जवाफ दिने भन्दै हजारौं युवाका लागि लाठी बनाउने काम भइरहेको बताउनुभयो । 

 

एमाओवादी अध्यक्ष दाहालले काँग्रेस र एमालेलाई पार्टीले आवश्यकताभन्दा बढी विश्वास गरेका कारण जनयुद्धका उपलब्धिको रक्षाका लागि फेरि आन्दोलन गर्नुपर्ने अवस्था सिर्जना भएको बताउनुभयो । उहाँले सुतेको सर्पलाई दुध खुवाउँदा त्यो सर्पले उठेपछि डस्छ भन्ने कुरामा ध्यान नदिनु पार्टीको कमजोरी भएको बताउनुभयो ।

 

प्रशिक्षण कार्यक्रममा अखिल नेपाल ट्रेड युनियन महासंघका अध्यक्ष शालिकराम जमकट्टेलले पार्टीले गरिरहेको आन्दोलनलाई प्रभावकारी बनाउन भूमिका नखेल्ने कार्यकर्तालाई जागिर र संगठनबाट निष्काशन गर्ने चेतावनी दिनभयो ।