काठमाडौँ,माघ १३

 

दुई तिहाइ वहुमतको प्रक्रिया अगाडि बढाएको विरोधमा बेल घेराउ गरेर एकीकृत नेकपा माओवादीलाई साथ दिएका पाँच साना दलले एमाओवादीको साथ छोडेका छन् ।

 

१९ दलीय मोर्चामा रहेका पाँच साना दलले मोर्चाको निर्णय विपरित सरकारसँग वार्ता गरेका छन् । मोर्चाले सहमतिका आधारमा संविधान बन्ने सुनिश्चित नभएसम्म सरकार र सत्तारुढ दलहरुसँग वार्ता नगर्ने भन्दै आन्दोलनका कार्यक्रम घोषणा गरेको भोलिपल्ट मोर्चामै रहेका पाँच साना दल प्रधानमन्त्री निवास बालुवाटारमा पुगेर सत्तारुढ दलहरुसँगको बैठकमा सहभागी भएका हुन् । 

 

 

१९ दलीय मोर्चामा रहेका नेपाली जनता दल, खम्बुवान राष्ट्रिय मोर्चा, नेपाः पार्टी, थरुहट तराई पार्टी, राष्ट्रिय जनमुक्ति पार्टीका तर्फबाट नेपाली जनता दलका अध्यक्ष हरिचरण साह सत्तारुढ दलहरुको बैठकमा सहभागी हुनुभएको हो । 

 

नेपाली जनता दलका अध्यक्ष साहले प्रश्नावली समिति निर्माण भएसँगै संविधान निर्माणमा देखिएको अवरोध हटेको भन्दै आफूहरु अब आन्दोलनको सट्टा संविधान निर्माणमा सहभागी हुने बताउनुभयो ।