काठमाडौँ,माघ ,१३

एकीकृत नेकपा माओवादीले प्रक्रिया र वार्ता सँगसँगै अघि बढ्न नसक्ने भन्दै सहमतिका आधारमा संविधान बन्ने सुनिश्चित नभएसम्म सरकार र सत्तारुढ दलसँग वार्ता नगर्ने बताएको छ ।

 

रिपोर्टस क्लबले मंगलबार काठमाडौमा गरेको साक्षात्कारमा एमाओवादी नेता टोपबहादुर रायमाझीले  आफूहरु वार्तामा बस्न र प्रक्रियामा जान तयार रहेको तर त्यसका लागि सरकारले दुई तिहाइ वहुमतको प्रक्रिया अघि नबढाउने ग्यारेण्टी गरेर वातावरण बनाउनुपर्ने बताउनुभयो । उहाँले सरकारले घाँटीमा तरबार तेर्साएर वार्तामा बोलाएका कारण तत्काल वार्ताको सम्भावना नरहेको बताउनुभयो । 

 

साक्षात्कारमा सत्तारुढ दलका नेताहरुले सहमतिका नाममा प्रक्रिया रोक्नुपर्ने शर्त स्वीकार नगर्ने बताए । नेपाली काँग्रेसका प्रवक्ता दिलेन्द्रप्रसाद बडु र नेकपा एमालेका सचिव प्रदिप ज्ञवालीले आफूहरु संविधानका विवादित विषयमा सहमति होस् भन्ने पक्षमा रहेको भन्दै एमाओवादी विना सर्त वार्तामा आउनुपर्ने बताउनुभयो । उहाँहरुले एमाओवादी प्रश्नावली समितिमा सहभागी नभए पनि प्रश्न बनाउने र मस्यौदा निर्माणको काम नरोकिने बताउनुभयो । 

 

साक्षात्कारमा काँग्रेस प्रवक्ता बडु र एमाले सचिव ज्ञवालीले संविधानसभा भंग गर्नुपर्ने माग गर्दै आएको नेकपा माओवादीसँग एमाओवादीले सहकार्य गर्नु आपत्तिजनक भएको बताउनुभयो । साक्षात्कारमा सद्भावना पार्टीका सहअध्यक्ष लक्ष्मणलाल कर्णले भने नेपाली काँग्रेस र नेकपा एमालेले मोर्चाबन्दी गरेर नौ बुँदे अवधारणा तयार पारेका कारण आफूहरु विगतमा भएका सहमतिको भावना अनुसारको संविधान बनाउन दवाब दिनका लागि मोर्चाबन्दी गर्न वाध्य भएको बताउनुभयो ।